KOMS në bashkëpunim me OMK implementon projektin “Kujdesi dhe qasja e mjekut ndaj pacientit”

Projekti “Kujdesi dhe qasja e mjekut ndaj pacientit ” i implemetuar nga KOMS me kërkesën dhe mbështetjen e Odës së Mjekëve të Kosovës ka pasur qëllim realizimin e anketave me pacientë në të gjitha nivelet shëndetësore në Kosovë, në institucionet publike dhe ato private, për të testuar përshtypjen e përgjithshme të pacientëve të këtyre institucioneve lidhur me nivelin e cilësisë së ofruar nga mjeku gjatë trajtimit mjekësor dhe gjithashtu nivelin e kënaqshmërisë në raport me shërbimin e ofruar.

Fokusi primar i pyetjeve të anketës ka qenë:

• Matja dhe njohja e nivelit të kënaqshmërisë së pacientëve lidhur me ofrimin e shërbimeve mjekësore
• Identifikimi i shkaqeve të pakënaqësisë së pacientëve me shërbimet shëndetësore të pranuara
• Matja e nivelit të njohurive të popullatës lidhur me kompetencat publike dhe rolin e Odës së Mjekëve të Kosovës.

Sondazhi është realizuar nga data 14 deri më 27 nëntor 2018.

Përpunimi i të dhënave është realizuar nga data 4 deri më 10 dhjetor 2018.

MOSTRA

Anketa u realizua me 1500 pacientë në qendra të ndryshme të Kosovës të shpërndara si më poshtë. Të anketuar ishin 750 pacientë të gjinisë femërore dhe 750 pacientë të gjinisë mashkullore.

Faktorët që u morën në konsideratë për profilizimin e të anketuarve janë:

1. Gjinia
2. Mosha
3. Niveli i shkollimit
4. Lokalizimi gjeografik
5. Institucionet shëndetësore të vizituara

BURIMET NJERËZORE

Për realizimin e projektit, KOMS përmes thirrjes publike ka angazhuar një grup punues prej 13 personash, prej të cilëve 8 kanë punuar vetëm në terren, 3 vetëm në përpunim të të dhënave dhe 2 në të dy fushat.

PËRPUNIMI I TË DHËNAVE

Përpunimi i të dhënave është bërë me programin profesional statistikor SPSS (Statistical Package for the Social Sciences). Interpretimi i rezultateve është bërë përmes faktorëve të identifikuar më sipër për profilizimin e të anketuarve.

REZULTATET

Rezultatet e detajuara me interpretim të të dhënave në bazë të secilës qendër i janë dorëzuar paraprakisht Odës së Mjekëve të Kosovës në formë elektronike. Në këtë raport narrativ do të përfshihen vetëm rezultatet e përgjithshme të interpretuara në nivel kombëtar.

Institucioni shëndetësor

Pjesa më e madhe e të anketuarve kanë qenë pacientë në Qendrat Kryesore të Mjekësisë Familjare (35%) dhe në Qendrën Klinike Universitare të Kosovës (35%). Pacientë në Spitalet Regjionale kanë qenë 20% e të anketuarve, pacientë në Spitalet Private 9% e të anketuarve dhe pacientë të Qendrës së Mjekësisë Urgjente rreth 1%.

Grupmosha

Pjesa më e madhe e të anketuarve i përkasin moshës 40-65 vjeç (38 %), pasuar nga grupmosha 18-40 vjeç (36%), grupmosha deri në 18 vjeç (13%) dhe mbi 65 vjeç (14%)

Gjinia

Të anketuarit i përkasin 50% gjinisë femërore dhe 50% gjinisë mashkullore. Kjo përqindje është përcaktuar paraprakisht edhe anketimi ka respektuar këtë kriter në çdo qendër.

Niveli i shkollimit

Pjesa më e madhe e të anketuarve kanë mbaruar shkollimin e mesëm (44%), shollimin e lartë kanë mbaruar 27%, atë fillor 23%, ndërsa të pashkolluar janë 6% e të anketuarve.

Trajtimi i barabartë i pacientëve

Pjesa më e madhe e të anketuarve kanë thënë se mendojnë që pacientët trajtohen në mënyrë të barabartë (49%), ndërsa 35% e të anketuarve mendojnë se pacientët nuk trajtohen në mënyrë të barabartë. 16% e të anketuarve janë shprehur se nuk e dijnë nëse trajtimi është i njejtë.

Respektimi i privatësisë së pacientëve

Pjesa më e madhe e të anketuarve kanë thënë se mendojnë që privatësia e tyre respektohet (55%), 17% e tyre mendojnë se privatësia e tyre nuk respektohet, ndërsa 27% kanë deklaruar se nuk e dijnë.

Mjaftueshmëria e stafit mjekësor

45% të anketuarve kanë thënë se mendojnë që ka staf të mjaftueshëm mjekësor, 42% mendojnë që stafi është i pamjaftueshëm, ndërsa 14% kanë deklaruar se nuk e dijnë.

Pastërtia në institucionet shëndetësore

41% e të anketuarve mendojnë se pastërtia në institucione është në nivel të mirë, 40% mendojnë se niveli i pastërtisë është mesatar dhe 19% mendojnë se pastërtia është jo e mirë.

Koha e kushtuar gjatë vizitës

Pjesa më e madhe e të anketuarve kanë thënë se mendojnë që mjeku ju kushton mjaftueshëm kohë gjatë vizitës (70%) ndërsa 30% mendojnë se kjo kohë nuk është e mjaftueshme.

Sqarimi i sëmundjes dhe këshillimi rreth saj

Pjesa më e madhe e të anketuarve kanë thënë se mendojnë që mjeku ju sqaron mjaftueshëm sëmundjen që kanë dhe ju jep këshilla rreth saj (58%), 27% mendojnë se mjeku e bën këtë mesatarisht, ndërsa 14% mendojnë se sqarimi dhe këshillat janë të pamjaftueshme.

Sqarimi dhe këshillimi mbi përdorimin e barnave dhe efektet tyre të mundshme anësore

Pjesa më e madhe e të anketuarve kanë thënë se mendojnë që mjeku ju ka sqaruar mjaftueshëm mënyrën e përdorimit dhe efektet anësore të barnave (56%), 29% mendojnë se mjeku e bën këtë mesatarisht, ndërsa 14% mendojnë se sqarimi dhe këshillat janë të pamjaftueshme.

Gatishmëria e mjekut për përgjigje

Pjesa më e madhe e të anketuarve kanë thënë se mendojnë që mjeku ka qenë i gatshëm të përgjigjet në pyetjet e tyre eventuale rreth sëmundjes dhe trajtimit (62%), 27% mendojnë se mjeku ka qenë mesatarisht i gatshëm, ndërsa 11% mendojnë se gatishmëria ka qenë e pamjaftueshme.

Kënaqshmëria me gjendjen pas trajtimit

Pjesa më e madhe e të anketuarve kanë thënë se janë të kënaqur me gjendjen pas trajtimit të mjeku (54%), 32% e të anketuarve janë mesatarisht të kënaqur ndërsa 14% nuk janë të kënaqur.

Aftësia diagnostike e mjekut

Pjesa më e madhe e të anketuarve kanë thënë se mendojnë që mjeku ka aftësi të mira diagnostike (59%), 31% mendojnë se aftësitë diagnostikuese të mjekut janë mesatare, ndërsa 10% mendojnë se mjeku nuk ka aftësi të mira për diagnostikim të sëmundjes.

Mungesa e mjeteve të punës

Pjesa më e madhe e të anketuarve kanë thënë se ju ka ndodhur që mjekut të i mungojnë mjetet elementare të punës (77%) ndërsa 23% kanë deklaruar që nuk kanë hasur në këtë dukuri asnjëherë.

Vizita vullnetare te mjeku

Pjesa më e madhe e të anketuarve kanë thënë se nuk kanë qenë asnjëherë për vizitë vullnetare te mjeku (57%), 33% të të anketuarve kanë qenë të paktën një herë në vizitë vullnetare ndërsa 11% janë shprehur se nuk ju kujtohet nëse kanë qenë ose jo.

Hera e fundit e vizitës vullnetare

Prej 57% të të anketuarve që kanë deklaruar se kanë qenë në vizitë vullnetare te mjeku, pjesa më e madhe (48%) kanë thënë se nuk ju kujtohet kur ka qenë kjo, 17% e tyre kanë qenë para të paktën tre muajve, 14% para të paktën gjashtë muajve, ndërsa 13% të paktën para një viti.

Sjellja e stafit mjekësor

Pjesa më e madhe e të anketuarve kanë thënë se mendojnë që stafi mjekësor ka sjellje të mirë (56%), 33% e tyre kanë thënë se kjo sjellje është shumë e mirë, ndërsa 11% mendojnë se sjellja e stafit mjekësor është jo e mirë.

Respektimi i orarit të punës

37 % e të anketuarve mendojnë se mjekët e respektojnë orarin e punës, 37% mendojnë se mjekët e respektojnë mesatarisht orarin, ndërsa rreth 25% e të anketuarve mendojnë se mjekët nuk e respektojnë orarin.

Kënaqshmëria e përgjithshme me shërbimet mjekësore

Pjesa më e madhe e të anketuarve kanë thënë se janë mesatarisht të kënaqur me shërbimet mjekësore në Kosovë (53%), 24% janë shumë të kënaqur, ndërsa 23% janë pak të kënaqur me këto shërbime.

Njohja e Odës së Mjekëve të Kosovës-OMK

Pjesa më e madhe e të anketuarve kanë thënë se nuk kanë dëgjuar më parë për funksionin e OMK (64%), ndërsa 36% kanë dëgjuar për funksionin e OMK.

Mundësia e ankimit për shkelje te OMK

Prej 36% të të anketuarve që kanë dëgjuar më parë për funksionin e OMK, 74% nuk e kanë ditur që mund të i drejtohen këtij institucioni për shkeljet eventuale etike dhe profesionale ng stafi mjekësor, ndërsa 26% e kanë ditur këtë gjë.

PËRFUNDIM DHE REKOMANDIME

Për realizimin e projektit, KOMS në përgjithësi nuk ka hasur në pengesa dhe ndalesa gjatë punës në terren dhe institucionet ku është bërë anketimi i pacientëve janë treguar mjaft bashkëpunuese. KOMS rekomandon vlerësimin periodik të nivelit të kënaqshmërisë së pacientëve me shërbimet mjekësore në institucionet shëndetësore në Kosovë. Duke pasur parasysh rezulatet e sondazhit, KOMS rekomandon promovim më të madh të funksionit të Odës së Mjekëve të Kosovës, në mënyrë që të rritet vetëdija e pacientëve dhe niveli i tyre i edukimit shëndetësor.

Rezultatet e hulumtimit:

1. Raporti Narrativ-OMK KOMS

Kujdesi dhe qasja e mjekut ndaj pacientit