Ftesë për pjesëmarrje në Kongresin e 14-të Ballkanik të ORL dhe Kirurgjisë së Kokës dhe Qafës

Të nderuar anëtarë të Odës së Mjekëve të Kosovës,

Oda e Mjekëve të Kosovës, në kuadër të përkrahjes për edukimin e vazhdueshëm profesional, është duke e mbështetur dhe bashkëorganizuar, së bashku me Shoqatën e Otorinolaringologëve dhe Kirurgëve të Kokës dhe Qafës të Kosovës, Kongresin e 14-të Ballkanik të ORL dhe Kirurgjisë së Kokës dhe Qafës.

Ky kongres është i akredituar me:

• 25 pikë për pjesëmarrje aktive
• 20 pikë për pjesëmarrje pasive

Ju ftojmë të bëheni pjesë e një prej ngjarjeve më të rëndësishme shkencore në rajon, i cili do të mbahet në Prishtinë, më 11–13 Qershor 2026, në Hotel Emerald. Kongresi do të mbledhë ekspertë të njohur, klinicistë, studiues dhe profesionistë shëndetësorë nga Ballkani dhe më gjerë, duke krijuar një platformë dinamike për shkëmbim të dijes dhe përvojës. Numri i pjesëmarrësve është i kufizuar ndërsa pjesëmarrja është pa pagesë për anëtarët e Odës së Mjekëve të Kosovës.

Pavarësisht nëse jeni specialist me përvojë, specializant apo në fazat e hershme të karrierës akademike, kjo është një mundësi ideale për të prezantuar punën tuaj shkencore, përvojat klinike, teknikat inovative dhe rezultatet kërkimore para një audience ndërkombëtare. Kontributi juaj do të ndihmojë drejtpërdrejt në avancimin e praktikës klinike dhe forcimin e bashkëpunimit profesional.

Inkurajojmë dorëzimin e abstrakteve në një gamë të gjerë temash që ndërlidhen me ORL dhe KKQ, përfshirë punime klinike, studime kërkimore, prezantime rastesh, teknika kirurgjikale, inovacione diagnostike dhe terapeutike, si dhe qasje multidisiplinare.

Për dorëzimin e abstrakteve dhe informata shtesë, ju lutemi vizitoni:
https://orl-ks.org/abstract-submission-2026/

Kongresi organizohet në bashkëpunim ndërmjet Odës së Mjekëve të Kosovës, Shoqatës së Otorinolaringologëve dhe Kirurgëve të Kokës dhe Qafës të Kosovës, Konfederatës Evropiane të ORL dhe KKQ, si dhe Shoqatës Ballkanike të ORL dhe KKQ.

Pasi që kongresi është gjithballkanik, abstraktet duhet të dorëzohen në gjuhën angleze. Të drejtë aplikimi kanë mjekët e ORL dhe KKQ, mjekët e përgjithshëm, si dhe profesionistë të tjerë të disiplinave të ndërlidhura.

Për më shumë informata kontaktoni në emailin info@orl-ks.org apo numrin e telefonit +383 44 192 847