Vazhdon bartja e kompetencave publike nga Ministria e Shëndetësisë tek Oda e Mjekëve të Kosovës

Në Qendrën për Zhvillimin e Mjekësisë Familjare, sot është mbajtur ceremonia solemne e bartjes formale të dy kompetencave publike përkitazi me licencimin dhe rilicencimin e mjekëve dhe Edukimin e Vazhdueshëm profesional, nga  Ministria e Shëndetësisë tek Oda e Mjekëve të Kosovës.

Me këtë rast Ministri i Shëndetësisë, z.Uran Ismaili,  përgëzoi kryetarin e OMK-së për punën e mirë që ka bërë dhe ndryshimet e arritura për një kohë të shkurtër qysh nga marrja e detyrës si kryetar i Odës së Mjekëve të Kosovës. Po ashtu, shprehu kënaqësinë që më në fund OMK-së po i barten kompetencat të cilat i takojnë sipas ligjit për OPSH-të.

“E vlerësoj të rëndësishme këtë ditë, pasi kjo ceremoni do të duhej të ndodhte vite më parë dhe sot të shihnim sukseset tjera të Odës së Mjekëve”- tha Ministri Ismaili.

Ndër të tjera, Ministri theksoi se marrja e kompetencave nuk nënkupton privilegj, por përgjegjësi dhe motiv për të zbatuar reformat në shëndetësi, të cilat duhet bërë bashkërisht.

Ndërkaq, kryetari i Odës së Mjekëve të Kosovës dr. Pleurat Sejdiu  vlerësoj lartë përkrahjen e Ministrit Ismaili për mbështetjen e Ministrisë e Shëndetësisë dhe gatishmërinë e së njejtës për një bashkpunim  konsistent ne funkcionalizimin e OMK-së.

Kryetari Sejdiu theksoi se: “ Oda do të jetë  partnere e plotë, në mbështetje të plotë dhe çdo nevojë që ne nuk mund ta identifikojmë, e që ju si ministri  do ta idenfikoni, ne do të jemi të hapur për bashkëpunim”.

Tanimë Oda e Mjekëve të Kosovës , përveç mbikëqyrjes  etike, ka në kompetencë proceset e licencimit, rilicencimit dhe Edukimit të Vazhdueshëm Profesional.

Kryetari shprehu faleminderim të veçantë për mbështetjen e dhënë nga Projetkti  i Qeverisë së Luksemburgut, KSV/017 “Programi Mbështetës për Shëndetësi në Kosovë-faza II”, gjatë gjithë proceseve që ka kaluar Oda e Mjekëve të Kosovës.

Gjithëashtu, kryetari i OMK-se dr. Pleurat Sejdiu dhe Ministri i Shëndetësisë, z.Uran Ismaili, me këtë rast bënë shpërndarjen e kartelave të para të anëtarësisë të mjekëve në OMK.  Në vazhdim të konferencës për medie është bërë lansimi zyrtar i web-faqes të OMK-së, ku anëtarët e Odës së Mjekëve dhe publiku mund të informohen për të ngjarjet dhe shërbimet që ofrohen nga OMK.

Kryetari me këtë rast theksoi se tani e tutje të gjithë anëtarët e Odës përmes ueb faqes e kanë mundësinë për të raportuar dhunën dhe sulmin ndaj mjekut përmes formularit që gjendet në ueb faqe dhe t’i plasojnë  informatat tjera relevante për raportim.