Sqarimi i OMK-së për “kirurgun” Italian, kryelajm në Rumani

Kryetari i Odës së Mjekëve të Kosovës, Dr. Pleurat Sejdiu, ia ka sqaruar Kolegjit të Mjekëve të Rumanisë, rastin e shtetasit italian Mateo Politi i cili u arrestua në Rumani pasi u kap me një diplomë false të kirurgut të cilën e kishte marr në Kosovë.

Sejdiu ka sqaruar kolegët e tij rumun se ky person e ka siguruar diplomën false nga Universiteti paralel i Prishtinës në veri të Kosovës, i cili udhëhiqet nga strukturat paralele me ndihmën e shtetit të Serbisë, transmeton Gazeta Shneta.

“Ky sistem paralel i institucioneve të përkrahura drejtpërdrejt nga Serbia, ka përfshirë edhe funksionimin e të ashtuquajturave institucioneve të arsimit të lartë. Në kuadrin e këtyre institucioneve paralele të arsimit të lartë është edhe Universiteti paralel i Prishtinës, i cili ende në ditë të sotit funksionon jashtë kornizës ligjore të Republikës së Kosovës. Ky institucion paralele, i cili fizikisht gjendet në pjesën veriore të qytetit të ndarë të Mitrovicës, i zhvillon aktivitetet jashtë kurrikulave të miratuara nga Ministria e Arsimit”, thuhet në sqarim.

“Në këtë drejtim rasti i ‘kirurgut plastik’ nga Italia nuk është dokument valid dhe i cili mund të identifikohet me institucionet e Republikës së Kosovës. Ky rast nuk është edhe i vetmi që del në shesh nga ky ‘universitet’”, thuhet tutje në sqarimin e Sejdiut për Kolegjin e Mjekëve rumun.

E kjo letër sqaruese e Sejdiut dërguar Kolegjit të Mjekëve të Rumanisë është bërë lajmi kryesor i ditës në disa media të Rumanisë. “libertatea.ro” e ka vendosur në titull sqarimin e mjekut kosovar. Në lajmin e publikuar thuhet se “Oda e Mjekëve të Kosovës konfirmon diplomën e rrejshme të mjekut: I ‘njëjti’ doktor u përpoq të mashtrojë kirurgët në Kosovë’”, citohet Sejdiu në titullin e medias rumune.

Edhe “gandul.info”, e ka paraqitur pothuajse në mënyrë të njëjtë këtë sqarim

Sqarimin e plotë mund ta lexoni më poshtë. /Gazeta Shneta/