Historiati i shkurtë

Fillet e para për themelimin e Odës së Mjekëve janë shënuar nga viti 2010. E gjitha ka filluar si iniciativë e Odës së Mjekëve të Gjermanisë, pasi është vërejtur mungesa e përfaqësimit profesional të mjekëve në evente ndërkombëtare të karakterit shëndetësor.

Iniciativa konkrete për themelimin e Odës së Mjekëve të Kosovës dhe organizimin profesional të përfaqësimit të mjekëve, është ndërrmarrë nga Dr. Ramin Parsa Parsi, Dr. Salih Berisha dhe Dr. Domen Podnar

Inagurimi i Odës së Mjekëve të Kosovës është bërë me datën 10 nëntor 2013, dhe  gjithashtu zgjedhja e kryetares së OMK-s, Prof. Dr.Zylfije Hundozi. Kryetarja pas zgjedhjes së saj propozoj si zëvendës kryetar të OMK-së, Dr.Arben Grazhdani dhe Dr.Rrezart Halili ku të dy propozime u votuan nga antarët e Kuvendit. Mes tjerash, në këtë ceremoni solemne kanë marrë pjesë edhe përfaqësuesit e Odave Mjekësore nga Gjermania, Austria, Hungaria, Kroacia, Mali i Zi, Maqedonia, Shqipëria dhe përfaqësues  të lartë të misioneve diplomatike në Kosovë. Si mysafirë special kanë qenë të pranishëm edhe presidenti i Asociacionit Mjekësor Boteror, Dr. Otman Kloibe dhe zëvendës Presidenti i Shoqatës Gjermane Mjekësore dhe njëherish Kryetari i Odës së Mjekëve të Bavarisë, Dr. Maks Kaplan.

Kontribut të jashtëzakonshëm në themelimin dhe zhvillimin institucional të Odës së Mjekëve të Kosovës ka dhënë Qeveria e Dukatës së Madhe të Luksemburgut përmes projektit për shëndetësi në Kosovë.

Kuvendi i OMK-së, në mbledhjen e rradhës ka zgjedhur organet e saja, sic janë: Këshilli Drejtues, Këshilli Mbikqyrës, Këshilli Etik, Gjyqi i Nderit, Prokurori i Odës dhe Komisionet e Përhershme.

Gjatë mandatit të Kuvendit të OMK-së, është krijuar infrastruktura ligjore ku është miratuar Statuti i OMK-së, Kodi i Etikes Profesionale dhe rregulloret e ndryshme të punës. OMK gjithashtu, ka pasur një përfaqësim të denjë në sferën ndërkombëtare, ku përfaqësuesit e OMK-së kanë marrë pjesë në ngjarje të ndryshme. Gjithashtu, gjatë këtij mandati janë mbajtur nëntë mbledhje të Kuvendit.

Duke u bazuar në ligjin për OPSH-në ku theksohet se bartja e kompetencave publike nga MSH-ja tek OMK, duhet të ndodh pas tri viteve të themelimit të OMK-së, fatkeqësisht një gjë e tillë nuk ka ndodhur për shkak të sfidave të ndryshme gjatë procesit së bartjes së kompetencave.

OMK ka qenë e vetmja Odë nga pesë Odat e profesionistëve shëndetsorë, të cilës nuk iu ka bart asnjë kompetencë e garantuar me ligj për OPSH-të.

Në shtator të 2017, Këshilli drejtues i OMK-së emëroi KQZ-në e OMK-së për të organizuar dhe udhëhequr zgjedhjet për antarët e Kuvendit dhe Kryetarin e OMK-së.

Me 31 tetor, KQZ e OMK-së shpalli zgjedhjet për antarët e Kuvendit dhe njëkohësisht caktoj datën e zgjedhjeve, 01 dhjetor 2017.

Kuvendi, si organi më i lartë i këtij Institucioni përbëhet nga 134 anëtarë. Ky Kuvend, në Dhjetor të vitit 2017, emëroi Kryetar të OMK-së Dr. Pleurat Sejdiu, si dhe nënkryetarët Dr. Rrezart Halili dhe Dr. Naser Gjonbalaj.

Gjatë periudhës 2017-2020 janë mbajtur 7 mbledhje të Kuvendit. Ndryshe nga herët tjera me 25 Nëntor 2020, për shkak të pandemisë, takimi është realizuar online përmes platformës Zoom. Në këto takime janë shqyrtuar dhe janë marrë vendime të rëndësishme sa i përket funksionimit të sistemit shëndetësorë në Kosovë, gjë që reflekton edhe në mbarëvajtjen e punës së OMK-së, si organizatë. Temat të cilat janë trajtuar në këto mbledhje gjatë vitit 2018-2019 kanë të bëjnë kryesisht me Rregulloren për regjistrimin, licencimin dhe rilicencimin e Mjekëve, Rregulloren për procedurat Vendimmarrëse të Organeve të OMK-së, Amandamentet për plotësimin dhe ndryshimin e rregullores për Edukimin e Vazhdueshëm Profesional, Rregullorja për përcaktimin e llojeve të shkeljeve etike etj.