Revista Mjeku, Vëllimi 1/Numri 4 – Vaksinat

REVISTA MJEKU Vëllimi 1/Numri 4 – Vaksinat

Të nderuar lexues të Revistës Mjeku,

Kemi kënaqësinë të ju njoftojmë për numrin e katërt të Revistës Mjeku me temë bosht “Vaksinat”.

Fjala e Kryeredaktorit

Asnjëherë më shumë se sot vaksinat nuk kanë qenë subjekt i lajmit dhe i konspiracionit.

Informacione të shumta, shpesh të pakontrolluara vazhdimisht qarkullojnë në mediet elektronike dhe në rrjetet sociale duke shkaktuar konfuzion global.

Misioni ynë si mjekë, karshi këtij “breshëri informacionesh” është t’i edukojmë të tjerët duke u përfshirë në biseda konstruktive përmes strukturimit të bisedës në disa pika, si: 1. Të dëgjuarit me ndjeshmëri, 2. Pyetjet e hapura, 3. Ndarja e informacioneve të besueshme dhe 4. Elaborimi i arsyeve pse vaksinimi është i rëndësishëm.

Të dëgjuarit me ndjeshmëri, duke e respektuar bashkëbiseduesin është pikë e rëndësishme gjatë bisedave sepse njerëzit kanë pyetje në lidhje me vaksinat, posaçërisht për shkak të faktit se kanë qenë të eksponuar në informata të ndryshme dhe kontradiktore nga rrjetet sociale.

Përmes pyetjeve të hapura në stilin: “Çka keni dëgjuar për vaksinat?” ose “Pse mendoni ashtu?” mund t’i kuptoni më mirë brengat e njerëzve e gjithashtu mund të nxitet reagim kritik i tyre ndaj vetvetes se pse mendojnë në atë mënyrë.

Ndarja e informacioneve të besueshme nënkupton orientimin e njerëzve në “adresat” e duhura dhe profesionale të marrjes së informacioneve. Pyetjeve siç janë: “Si mund ta di se vaksinat janë të sigurta?” duhe t’i përgjigjemi me fakte shkencore apo duke i drejtuar në adresat e duhura se ku gjenden këto informacione.

Kur bisedohet në lidhje me vaksinimin duhet të fillojmë nga vetvetja. Ne duhet t’i ndajmë me të tjerët arsyet vetanake se pse jemi vaksinuar, cilat janë dobitë personale, të familjes, të kolektivit dhe të shoqërisë nga vaksinimi i sukseshëm.

Për fund, bashkëbiseduesit tanë që nuk i takojnë fushës së mjekësisë duhet ta kuptojnë se vaksinimi mbetet arma më e besueshme dhe e dëshmuar për t’u përgjigjur në mënyrë efikase sëmundjeve të parandalueshme, të cilat pëndryshe mund të jenë shkatërruese për njerëzimin.

Me nderime,
Revista Mjeku