Qarkore informative lidhur me veprimtarinë e OMK së gjatë zbatimit të masave mbrojtëse qeveritare

Të nderuar anëtarë dhe nëpunës të Shërbimit Profesional të OMK-së,

Siç jeni të njoftuar paraprakisht, Qeveria e Kosovës me datë 12. Nëntor 2020 ka nxjerrë Vendimin nr. 01/42, me të cilin janë përcaktuar masat mbrojtëse për parandalimin dhe trajtimin e virusit pandemik COVID 19. Me qëllim të zbatimit të Vendimit nr. 01/42 dhe për shkak të natyrës së veçantë të veprimtarisë së OMK-së, me këtë Qarkore Informative Ju njoftojmë për funksionimin e OMK-së për ditët në vijim, respektivisht deri në zbatimin e masave të tilla të përkohshme.

Që nga data 13 nëntor 2020, OMK-ja do të funksionojë si në vijim:

• Reduktohet stafi i shërbimit profesional bazuar në specifikat që kanë dhe duke marrë parasysh udhëzimet e specifikuara për organizimin e punës në “Manualin për mbrojtjen nga përhapja e Covid-19”. Të gjitha shërbimet e mundshme për anëtarët të OMK-së rekomandohet që të bëhen përmes ueb faqes zyrtare të OMK-së dhe postës zyrtare elektronikle të OMK-së. Udhëzohen anëtarët e OMK-së që gjatë orarit të rregullt të punës për çdo informatë shtesë të kontaktojnë me zyrtarët kujdestar në numrin të telefonit zyrtar të OMK-së si në vijim: + 383 (0)49 872 300 dhe + 383 (0) 49 872 070.
• Të gjitha mbledhjet e organeve të OMK-së mbahen online deri në përfundimin e zbatimit të masave mbrojtëse.

Për shkak të gjendjes së krijuar, OMK-ja e përkushtuar që të zbatojë autoritetin e saj ligjor të përfaqësimit të të drejtave profesionale të mjekëve, do të jetë në dispozicion për anëtarësinë e saj në këto momente të vështira dhe sfiduese për profesionin e tyre fisnik.