Prof. Dr. Bashkim Ziberi – Ligjërues i ftuar në Kongresin e dytë të mjekësisë, Onkologji

Prof. Dr. Bashkim Ziberi ka lindur në vitin 1974 në Tetovë, Republika e Maqedonisë së Veriut. Studimet në fushën e Fizikës i kreu në Fakultetin e shkencave të Natyrës në Universitetin e Tiranës, në vitin 1998. Nga viti 1999 deri në vitin 2006 kryen me sukses studimet e Masterit dhe te Doktoratës në Universitetin e Leipzigut në Gjermani, në fushën e Nanoteknologjisë gjegjësisht krijimin e nanostrukturave me anë të rrezatimit jonik.

Prej vitit 2002 deri në Korrik të 2010 ka punuar si punonjës shkencor dhe si udhëheqës shkencor në Institutin për modifikime sipërfaqësore (IOM) në Leipzig të Gjermanisë, në fushën e inxhinieringut të sipërfaqeve të materialeve të ndyshme me anë të rrezatimit jonik. Prej vitit 2010 punon si mësimdhënës në Universitetin e Tetovës ku vazhdon edhe sot, ndër të tjera në lëndën e fizikës mjekësore në drejtimin mjekësi të përgjithshme. Gjatë kësaj periudhe ka qenë përgjegjës i katedrës së fizikës dhe udhëheqës i zyrës për hulumtime shkencore dhe inovacione në Universitetin e Tetovës. Dr. Ziberi ka qëndrime shkencore në ESRF-European Synchrotron Radiation Facility (Qendra Evropiane e Rrezatimit Sinkrotron) Grenoble, Francë dhe NSLS-National Synchrotron Light Source (Qendra Nacionale e Rrezatimit Sinkrotron), Brookhaven National Laboratory, Long Island, USA.

Dr. Ziberi, për punën e tij shkencore është vlerësuar me disa çmime ndërkombëtare nga E-MRS,  dhe shoqata Leibniz në Gjermani. Është reçenzues në një numër revistash ndërkombëtare dhe autor apo bashkëautor i mbi 40 punimeve shkencore, mbi 100 kontributeve në konferenca ndërkombëtare, prej të cilave 20 janë kumtesa të ftuara.

Dr. Ziberi është fitues i bursës Fulbright që i mundësoi një qëndrim shkencor 10 mujor në Fakultetin e Mjekësisë të Harvardit gjegjësisht në Brigham & Women’s Hospital dhe Dana-Farber Cancer Institute në Boston, SHBA. Fusha e interesit shkencor të tij janë në kombinimin e radioterapisë dhe imunoterapisë duke shfrytëzuar biomaterialet e mençura për trajtim të targetuar të sëmundjeve kancerogjene me anë të nanogrimcave. Ai gjithashtu është i përfshirtë në projekte të ndryshme mbi shëndetin global si Global Oncology University dhe samitin vjetor që mbahet në Fakultetin e mjekësisë së Harvardit.

Prof. dr. Bashkim Ziberi aktualisht punon si profesor i rregullt në Universitetin e Tetovës dhe si bashkëpunëtor i jashtëm në Dana-Farber Cancer Institute dhe Brigham & Womens Hospital pranë Fakultetit të Mjekësisë të Harvardit.