Përfundon seanca e dëgjimit publik në Kuvend

Para pak çastesh ka përfunduar seanca e dëgjimit publik në Kuvendin e Republikës së Kosovës, ku është diskutuar rreth pakos së projektligjeve për reformën e administratës publike.

Nënkryetari i Odës së Mjekëve, dr. Naser Gjonbalaj gjatë kësaj seance shpalosi propozimet në cilësinë e përfaqësuesit të Odës së Mjekëve të Kosovës, duke qartësuar se pozita e mjekut në Kosovë nuk është në pozitën e duhur duke pas parasysh profesionin fisnik të cilin e ushtrojnë.

Propozimet e bëra nga OMK për nivelizimin e pagave në Projektligjin e Pagave, mjekun specialist e vendosin në nivelin D1, mjekun në specializim në nivelin D4, ndërkaq mjekun e përgjithshëm, stomatologun dhe farmacistin në nivelin D5.

Poashtu, OMK dha propozimet e saja edhe për Projektligjin për Zyrtarët Publik. Me këtë rast dr. Gjonbalaj propozoj që në këtë ligj statusi i profesionistit shëndetësor të vendoset si zyrtar publik shëndetësor, kjo nënkupton që të gjithë profesionistët shëndetësor që punojnë në administratën shtetërore ta kenë statusin e njëjtë sikurse edhe profesionistët shëndetësor që punojnë në institucione shëndetësore, pra të gjithë profesionistët shëndetësor ta kenë të njëjtin status në punë, pavarësisht institucionit ku punojnë.

OMK beson se me propozimet e dhëna për këtë pako projektligjesh dhe me hyrjen e tyre në fuqi, do të ngritët dinjiteti dhe pozita e mjekut në vendin tonë.