Organizohet pjesa praktike për trajnimin nga lëmia e neonatologjisë

Nën mentorimin e Prof.dr. Boris Filipoviq-Grçiq, MD, PhD, Dr. Darjan Kardum, MD, PhD si dhe Dr.Teuta Hasbahta, në Spitalin e Përgjithshëm të Gjilanit u mbajt pjesa praktike për trajnimin nga lëmia e neonatologjisë me temë “Reanimimi neonatal/Oksigjenoterapia te të porsalindurit” dhe “Vendosja e kateterit qëndror(umbilikal) apo dhe vija të thella dhe transfuzioni te të porsalindurit”.

Trajnerët kishin përgatitur skenarë të rasteve simuluese me rritje graduale të kompleksitetit të rasteve në mënyrë që të formojnë një lakore zhvillimore të të mësuarit për secilin pjesëmarrës. Programi i rasteve ishte në përbërje duke filluar nga historiku i rastit, pritjet klinike, planifikimin, përgatitjen e një vendi pune dhe pajisjeve, vlerësimin fillestar, ndërhyrjet, rivlerësimin, veprimet e mëtejshme, parashikimet. Skenarët e simulimit mbuluan të gjitha rastet nga ato shumë të thjeshta tek ato më komplekse, duke përfshirë ato me komplikime (si pneumotoraksin etj).

Qëllimi i organizmit të trajnimeve është zhvillimi i vazhdueshëm profesional i mjekëve dhe ekipit mbështetës të punëtorëve shëndetësor të Spitalit të Përgjithshëm të Gjilanit dhe Prizrenit, për t’i mundësuar stafit të këtyre spitaleve, të ofrojë shërbime cilësore për pacientët, bazuar në standardet e njohura ndërkombëtare dhe praktikat më të mira mjekësore.

Organizimi i trajnimeve për mjekët e Spitalit të Përgjithshëm të Gjilanit dhe Prizrenit vijnë si rezultat i zbatimit të aktiviteteve të Marrëveshjes së Delegimit për Fonde dhe Zbatim (DAFI KSV/017 21 2749) ndërmjet Odës së Mjekëve të Kosovës dhe projektit LuxDev.