OMK reagon ashpër pas vendimit të Kushtetueses

Kryetari i Odës së Mjekëve të Kosovës Dr. Pleurat Sejdiu ka reaguar ashpër ndaj vendimit të Gjykatës Kushtetuese, e cila e shpalli të pavlefshëm Ligjin për Paga në sektorin publik, i cili sikur të implementohej mjekët do të paguheshin rreth 1200 euro në muaj.

Në një deklaratë për Gazetën Shneta, Sejdiu ka thënë se është e turpshme, denigruese dhe poshtëruese për punëtorët shëndetësor, aq më tepër në kohën e pandemisë.

“E turpshme, denigruese dhe poshtëruese në këtë kohë kur punëtorët shëndetësor janë të rraskapitur dhe institucionet shëndetësore para kolapsit. Për hapa të tjerë do t’ju lajmërojmë”, ka deklaruar Sejdiu.

Oda e Mjekëve vazhdimisht ka bërë thirrje për zbatimin e këtij ligji për shkak të pagave jo të dinjitetshme të mjekut në Kosovë, si dhe për të ndaluar ikjen e mjekëve të rinj për në vendet evropiane.

Oda e Mjekëve të Kosovës ka ftuar në një takim urgjent koordinues odat tjera të profesionistëve shëndetësor dhe Federatën e Sindikatave të Shëndetësisë.

Kujtojmë se kërkesat e punëtorëve shëndetësor për ngritje të pagave dhe për implementimin e këtij ligji janë nga viti 2018, kohë kjo kur hynë në grevë sindikata dhe kolegjiumi i kirurgëve të QKUK-së.

Artikull nga gazeta shneta

http://gazetashneta.com/sejdiu-reagon-ashper-pas-vendimit-te-kushtetueses-e-turpshme-dhe-poshteruese-per-punetoret-shendetesore/