OMK nënshkruan marrëveshje me FSSHK në mbrojtje të dinjitetit të profesionistëve shëndetësorë

Oda e Mjekëve të Kosovës ka nënshkruar marrëveshje me Federatën e Sindikatave të Shëndetësisë, me qëllim të bashkërenditjes se aktiviteteve në mbrojtje të dinjitetit të profesionistëve shëndetësorë.

Gjatë nënshkrimit të kësaj marrëveshje, kryetari i OMK-së, Dr. Pleurat Sejdiu dhe ai i FSSHK-së, Dr. Blerim Syla potencuan se do të luftojnë për sigurimin e dinjitetit të profesionistëve shëndetësorë. Kryetari i OMK-së, Dr. Pleurat Sejdiu theksoi se do të mbrohet dinjiteti personal dhe profesional i profesionistëve shëndetësorë, duke nënvizuar se ka qenë i nëpërkëmbur. “Nëse arrijmë që mjeku ta ketë pozitën e vetë të duhur në shoqëri, atëherë ky do të jetë suksesi jonë më i madh. Përmes ruajtjes së dinjiteti nënkuptojmë edhe ruajtjen e ligjshmërisë së sistemit, jo vetëm t’i mbrojmë mjekët apo anëtarët tonë, por t’i mbrojmë në bazë të ligjeve ku mbrohet e drejta dhe detyrimet e tyre”, ka shtuar ai.

Ndërsa, kryetari i FSSHK-së, Blerim Syla tha se punëtorët shëndetësorë do të kenë adresë problemet e tyre, derisa theksoi se do të ketë bashkëpunim edhe me sindikata të tjera. “Me këtë marrëveshje secili do t’i merr përsipër përgjegjësitë e veta dhe punëtorët shëndetësorë do të kenë adresë për problemet e tyre. Lufta për dinjitet dhe mirëqenie do të jetë e përbashkët edhe me sindikatat tjera”, tha Syla.