OMK, FSSHK dhe Kryetari i Komisionit për Administratë Publike diskutojnë Projektligjin për Paga

Nënkryetari i Odës së Mjekëve të Kosovës, Dr. Naser Gjonbalaj, kryetari i FSSHK-së, Blerim Syla dhe kryetari i Komisionit për Administratë Publike, Qeverisje Lokale dhe Media, Nait Hasani kanë mbajtur takim ku kanë diskutuar rreth Projektligjit për Pagat.

Përfaqësuesi i Odës së Mjekëve, Dr. Naser Gjonbalaj, theksoi se kërkesë e OMK-së ka qenë që mjeku të barazohet me profesorin universitar, duke shtuar se gjithashtu janë dhënë edhe disa vërejtje për disa nene të këtij Ligji.

Ndërsa, kryetari i Komisionit, Nait Hasani deklaroi qe janë duke marrë vërejtjet nga të gjithë përfaqësuesit e organizatave, por problemi është më shumë politik sepse përbërja e komisionit është e atillë që shkakton telashe për kalim ne komision por ofroi mbështetjen e tij te plotë.

Kryetari i FSSHK-së Dr. Blerim Syla deklaroi që nga momenti i parë kemi tentuar që të jemi konstruktiv.
“Ne interesin tonë nuk kanë qenë vetëm mjekët por të gjithë punëtorët shëndetësorë që janë gjithsej 14 mijë e qe kryejnë punë për 20 mijë punëtorë. Nëse shkrihet 44-shi ne pagë atëherë kostoja nuk është aq e lartë siç po deklarohet. Interes i joni është që të kalohet në lexim të parë e mandej mes tij dhe leximit të dytë ne do provojmë të lobojmë në të gjitha mënyrat, me këtë rast i ofroi edhe propozimet e FSSHK-së lidhur me ketë Projektligje”, tha ai.

Në fund të gjitha palët u zotuan që do mundohen që ky Projektligj të kalojë në lexim të parë në mënyrë qe të krijohet hapësirë për lobim të mëtutjeshëm.