Oda e Mjekëve të Kosovës organizoi seminar me temën: Përgjegjësia Penale dhe Etike në Veprimtarinë Mjekësore

Oda e Mjekëve të Kosovës organizoi seminar me temën: Përgjegjësia Penale dhe Etike në Veprimtarinë Mjekësore- Ndjekja penale dhe mbikëqyrja etike në kuadër të detyrës zyrtare mjekësore.

Pjesëmarrës në këtë seminar ishin më shumë se 20 përfaqësues të institucioneve relevante të Republikës së Kosovës ku ndër ta: Dr. Jusuf Ulaj, këshilltar politik në kabinetin e Kryeministrit, Dr. Anton Shllaku, këshilltar Politik i Ministrit të Shëndetësisë, znj. Albina Shabani- Rama, kryetare e Gjykatës Themelore, Prishtinë, z.Besnik Jakupi, prokuror pranë Prokurorisë Themelore, Prishtinë, Prof. Ismet Salihu, eksperti i Drejtësisë Penale, Dr. Valbon Krasniqi, drejtor i SHSKUK-së, udhëheqës të organeve të OMK-së, si dhe përfaqësues nga institucionet tjera shëndetësore, të drejtësisë dhe hetuesisë.

U diskutuan çështje si:
Detyra zyrtare në kuptim penal dhe juridik, Ndikimi i zbrazëtirave ligjore në veprimtarinë profesionale të mjekut, hetimi i veprave penale në fushën e mjekësore, mjeku mes betimit të Hipokratit dhe respektimit të ligjit,subjektet e autorizuara për inicimin e procedurës së mbikëqyrjes etike dhe profesionale, rritja e efikasitetit të mbikëqyrjes etike përmes bashkëpunimit institucional.

Dr. Pleurat Sejdiu, kryetari i Odës së Mjekëve falënderoi për prezencën e përfaqësuesve të institucioneve relevante dhe shpjegoi rëndësinë e këtij seminari për përgjegjësinë penale dhe etike në veprimtarinë mjekësore.

Prof. Ismet Salihu sqaroi në askeptin juridik dispozitat ligjore që prekin përgjegjësinë penale të mjekëve dhe profesionistëve shëndetësorë në përgjithësi.

Znj. Albina Shabani- Rama, kryetare e Gjykatës Themelore, Prishtinë, u shpreh e kënaqur lidhur me organizimin e këtij seminari kaq të rëndësishëm meqenëse çështjet që u diskutuan prekin drejtpërdrejt edhe punën e Gjyqtarëve dhe Prokurorëve gjatë shqyrtimit të rasteve për veprat penale, trajtim i pandërgjegjshëm mjekësor. Poashtu theksoi se çështja e kryerjes së ekspertizave mjekësore është e rëndësishme, të cila përkundër kërkesave të institucioneve të drejtësisë nuk po kryhen me kohë dhe kjo drejtpërdrejt ndikon në zvarritjen e shqyrtimit të lëndëve penale dhe civile pranë Gjykatave dhe Prokurorive.

Dr. Fejsal Mehmeti, kryetar i Këshillit Etik të OMK-së, tregoi shembuj nga praktika e punës të Këshillit Etik, ku trajtohen ankesat e palëve për shkelje Etiko Profesionale nga ana e mjekëve. Dr. Mehmeti theksoi rëndësinë e kryerjes së ekspertizave mjekësore si për nevojat e Organeve të OMK-së të mbikëqyrjes etike, poashtu edhe për nevojat e institucioneve të drejtësisë (Prokurorisë së Shtetit, Gjykatave).

Ky seminar kishte për qëllim edhe ngritjen e aftësive profesionale të stafit të OMK-së, të cilët gjatë punës së tyre të përditshme përballen me probleme të natyrave që u shtjelluan në këtë seminar.