NJOFTIM MBI PROCEDURAT E RILICENCIMIT GJATË EDUKIMIT SPECIALISTIK

Të nderuar specializantë,

Siç jeni në dijeni, nga data 26 prill 2018 kompetencat e licencimit dhe rilicencimit të mjekëve janë bartur nga Ministria e Shëndetësisë tek Oda e Mjekëve të Kosovës. Procedurat administrative për licencim dhe rilicencim tani janë të rregulluara me Rregulloren për Regjistrimin, Licencimin dhe Rilicencimin e Mjekëve, e cila është miratuar nga Kuvendi i OMK-së me datë 19 qershor 2018.

Në bazë të kësaj rregulloreje, specializantëve që janë duke ndjekur edukimin specialistik dhe të cilëve u ka skaduar licenca e mjekut të përgjithshëm, u mundësohet që të aplikojnë për rilicencim për afat më të shkurtër i cili korespondon me vitin në të cilin pritet që aplikuesi të përfundojë specializimin, por jo në afatshmëri më të shkurtë se 1 (një) vit. Po ashtu, aplikuesi nuk do të jetë i detyrueshëm që ta paguaj taksën e licencimit në shumë të plotë, por e paguan në përpjestim të viteve për të cilat lëshohet licenca, respektivisht për çdo vit duke kalkuluar 10.00 € taksë administrative.

Me rastin e rilicencimit, aplikuesit duhet paraprakisht të parashtrojnë aplikacionin për valorizim të pikëve kredituese pranë Komisionit për Edukim të Vazhdueshëm Profesional, i cili do të bëjë vlerësimin e përmbushjes së kushtit për pikët e mbledhura nga pjesëmarrja e aplikuesit në aktivitetet e Edukimit të Vazhdueshëm Profesional. Kriteri i përmbushjes së 100 pikëve për 5 vitet e fundit do të jetë i zbatueshëm edhe në rastet e rilicencimit të specializantëve që u ka skaduar licenca e mjekut të përgjithshëm dhe të cilët aplikojnë për rilicencim të tillë.