Të hënen punëtorët shëndetësor sërish në grevë për pagat

Federata e Sindikatave të Shëndetësisë ka vendosur që të hënën t’i rikthehen grevës për rritjen e pagave për punëtorët shëndetësorë

Këshilli Drejtues i Federatës së Sindikatave të Shëndetësisë, ka marr vendim që të hënën të mbahet grevë 24 orëshe. Gazeta ka mësuar se greva do të mbahet vetëm në Qendrën Klinike Universitare të Kosovës.

Lajmin për grevën e ka konfirmuar kryetari i FSSHK-së, Dr. Blerim Syla. Ai ka deklaruar për Gazetën Shneta se Këshilli Drejtues i federatës ka vendosur që të mbaj një grevë paralajmëruese për mospërmbushjen e kërkesave të tyre lidhur me projektligjin për pagat dhe kontratën kolektive.

“Të hënën mbahet grevë paralajmëruese një ditëshe e cila organizohet vetëm në QKUK. Greva do të mbahet për ligjin e pagave dhe kontratën kolektive. Ndërsa më 20 dhjetor Këshilli Drejtues do të mblidhet sërish për të vendosur se si do të veprohet tutje”, ka deklaruar Syla.

Gjinekologu ka deklaruar se sot është respektuar dita e themelimit të ushtrisë nga Kuvendi i Kosovës, për ka thënë se më nuk do të qëndrojnë të qetë.

“Sot e kemi respektuar ditën e themelimit të ushtrisë, ndërsa të hënën do të vazhdojmë me grevën. Ligji i pagave nuk është në procedurë dhe po ashtu në buxhet nuk është paraparë rritja e pagave. Prandaj pavarësisht situatës dhe rrethanave ne s’kemi rrugëdalje tjetër”, ka deklaruar kryesindikalisti Syla.

Gjatë ditës së hënë do të pranohen vetëm rastet emergjente ndërsa do të funksionojë edhe kujdestaria. /Gazeta Shneta/