Rreth 150 mjek të huaj punojnë ilegalisht në Kosovë

Kryetari i Odës së Mjekëve të Kosovës, Dr. Pleurat Sejdiu, ka thënë sot se deri më tani janë anëtarësuar 3681 mjekë, ku prej tyre vetëm 23 janë të huaj. Ai ka thënë se dyshohet se janë rreth 150 mjekë të huaj që punojnë në Kosovë e të cilët janë ilegal pasi nuk janë anëtarësuar në OMK

Kryetari i Odës së Mjekvë të Kosovës, Dr. Pleurat Sejdiu, ka folur sot në një konferencë për media për të arriturat e këtij institucioni. Ai ka bërë të ditur se deri më tani në OMK janë regjistruar 3681 mjekë, 23 janë të huaj, 327 mjekë që punojnë vetëm në sektorin privat dhe 300 mjekë të papunë.

“Neve çka na brengos këtu është shkelja e ligjit nga mjekët jokosovarë sepse informatat tona janë që rreth 150 mjekë të huaj punojnë në Kosovë dhe ata janë ilegalisht duke ofruar shërbime”, ka thënë Sejdiu. Ai ka kërkuar që të gjendet një zgjidhje edhe për mjekët e pa punë, shkruan Gazeta Shneta.

Kompetenca e parë që Oda e Mjekëve të Kosovës e ka marrë gjatë këtij viti ka qenë mbikëqyrja etiko-profesionale, për çka Sejdiu ka bërë të ditur se janë pranuar 21 lëndë, ku ka marrë vendime për 10 lëndë, 7 lëndë të tjera janë përcjell tek Prokurori i OMK, 2 janë në procedurë dhe 2 lëndë kanë qenë me afat të parashkruar. Ndërkaq Gjyqi i Nderit i OMK-së ka marr vendim kundër një mjeku për shkelje etiko-profesionale gjatë ushtrimit të detyrës.

Sejdiu ka deklaruar se nuk janë shumë të kënaqur me punën e këshillit etiko-profesional. Ai ka thënë se ka hezitime dhe presione nga jashtë, por është zotuar se do të rezistojnë. “Tani kemi dy raste të cilat janë iniciuar nga ju mediat dhe për njërën është marr vendimi por pala ka bërë ankesë. Ndërsa tjetra është më voluminoze por do të shkoj në seancë gjyqësore përkundër presioneve nga jashtë”, ka deklaruar Sejdiu. Ai ka theksuar se OSBE do t’i përkrah për trajnime të prokurorëve dhe gjyqëtarëve të Odës.

Kompetenca e dytë ka qenë edukimi i vazhdueshëm profesional, ku Sejdiu u shpreh se  problemi kryesor është se institucionet shëndetësore janë duke e shkelur ligjin e shëndetësisë, duke mos ofruar mjaftueshëm sipas obligimeve që i kanë për trajnimin dhe ngritjen e kapaciteteve profesionale të stafit të vet. Ndërsa, sa i përket kompetencës së rilicencimit, kryetari i Odës së Mjekëve, Pleurat Sejdiu, ka bërë të ditur se brenda vitit kanë lëshuar mbi 500 licenca të reja. Sejdiu ka folur edhe faksimilet, ku ka bërë të ditur se nga 1 shkurti i këtij viti do të hyj në fuqi vendimi që mjekët të kenë vetëm një faksimile.

Ndërkohë, Sejdiu ka thënë se bartja e kompetencës për edukimin specialistik tek Oda e Mjekëve është në proces e sipër. Ai ka folur edhe për raportin financiar, ku ka bërë të ditur se nga viti 2017 kanë trashëguar vetëm 35 euro dhe se kanë arritur të hyra prej mbi 303 mijë eurove gjatë këtij viti. /njofton Gazeta Shneta/