Me ligjin e ri mjekët do të paguhen afër 1200 euro, sindikalistët nuk pajtohen

Projektligji i ri për Pagat i miraturat nga Qeveria ditë më parë, ka renditur mjekët specialistë me koeficient 5.0 që në vlerë monetare i bie rreth 1195 euro pagë bruto.

Por Federata e Sindikatave të Shëndetësisë nuk janë pajtuar me këtë koeficient, si dhe nuk do ta pranojnë kategorizimin e mjekëve familjarë të cilët kanë koeficient 4.5, mjekëve në specializim me 3.65 si dhe mjekëve të përgjithshëm me 3.4, shkruan Gazeta Shneta.

Kryetari i FSSHK-së, Dr. Blerim Syla, ka thënë për Gazetën se kryesia e Federatës nuk është pajtuar me këtë projektligj dhe për këtë kanë dërguar vërejtjet përfshirë edhe ministrit të Shëndetësisë Uran Ismaili.

“Ne si Federatë nuk jemi pajtu me këtë dhe kemi dërguar vërejtjet tona. Ndërsa javën e ardhshme i kemi ftuar përfaqësuesit e partive politike pozitë e opozitë të cilët merren me shëndetësi, në një tryezë për t’ua bërë të ditur qëndrimet tona”, ka deklaruar Syla.

Ai insiston se rrogat e mjekëve nuk janë duke u rritur, por vetëm duke u nivelizuar me sektorët tjerët. Syla ka thënë se vërejtjet e FSSHK-së kanë të bëjnë edhe me kategorizimin e mjëkve familjarë, stomatologëve dhe mjekëve në specializim.

Në anën tjetër, kryetari i Odës së Mjekëve të Kosovës, Dr. Pleurat Sejdiu, ka thënë se janë pajtuar me koeficientin 5.0, ndonëse kërkesa e tyre kishte qenë 5.5 për çka ishin dakorduar edhe me Ministrinë e Shëndetësisë.

“Kërkesa jonë ka qenë reale, por edhe 5.0 është e pranueshme për ne nëse e krahasojmë me sektorët tjerë. Megjithatë kemi bërë vërejtje për kategorinë mjek familjar të renditur me koeficient 4.5. Nuk mund të ketë mjek familjar si kategori të veçant, sepse janë vetëm tri kategori: mjek i përgjithshëm, mjek specializant dhe mjek specialist. Ndërsa mjekët familjarë janë specialist dhe prandaj është e padrejtë për ta që të renditen si kategori më e ulët sesa specialistët”, ka deklaruar Sejdiu. /Gazeta Shneta/