Kryetari i OMK-së priti përfaqësues të Zyrës së BE-së për çështjet e komuniteteve jo shumicë

Kryetari i Odës së Mjekëve të Kosovës, Dr. Pleurat Sejdiu, ka pritur në takim znj. Agnieszka Stolarczyk, Këshilltare Politike për Çështjet e Komuniteteve Jo Shumicë pranë Zyrës së Përfaqësuesit të Posaçëm të Bashkimit Evropian në Kosovë, si dhe me z. Pleurat Kurti, Zyrtar për Çështjet e Komuniteteve Jo Shumicë në Sektorin Politik të së njëjtës zyrë.

Gjatë takimit u diskutuan çështje që lidhen me prioritetet, qasjen dhe sfidat në sektorin e shëndetësisë për komunitetet jo shumicë në Kosovë. Në fokus të diskutimit ishin përmirësimi i qasjes në shërbime shëndetësore cilësore, roli i profesionistëve shëndetësorë dhe rëndësia e bashkëpunimit institucional në adresimin e nevojave të këtyre komuniteteve.

Kryetari Sejdiu theksoi angazhimin e Odës së Mjekëve të Kosovës për promovimin e barazisë, gjithëpërfshirjes dhe standardeve profesionale në ofrimin e shërbimeve shëndetësore për të gjithë qytetarët e Kosovës, pa dallim.

Palët shprehën gatishmërinë për të vazhduar bashkëpunimin dhe dialogun në funksion të forcimit të sistemit shëndetësor dhe avancimit të të drejtave të komuniteteve jo shumicë.