Komunikatë për media

KOMUNIKATË PËR MEDIA

Sistemi shëndetësor paraqet një nga shtyllat kryesore të organizimit shoqëror, si nga pikëpamja e shtetit si organizim formal ashtu dhe nga aspekti i funksionimit të gjithëmbarshëm të shoqërisë. Funksionimi i këtij sistemi është i varur nga disa faktorë. Këta faktorë, qofshin ata nga pikëpamja e kushteve objektive që ndërlidhen me ushtrimin e veprimtarisë shëndetësore, apo edhe nga pikëpamja sociale që mund të konsiderohen si kushte subjektive për secili punonjës shëndetësor, janë ndër kushtet më thelbësore që ky sistem shoqëror të funksionojë dhe të jetë produktiv në kuptim të rolit të tij social.

Oda e Mjekëve të Kosovës, shfrytëzon rastin që të përsëritë qëndrimin lidhur me nevojën e ngritjes së pagave, që do të duhej kjo të shprehej me miratimin e Projekt-ligjit për pagat e funksionarëve publik. Në këtë kuptim, ne shprehim përkrahjen tonë për realizimin e kërkesave të punonjësëve shëndetësor të cilët përmes organizimit sindikal kanë paralajmëruar mbajtjen e grevës për realizimin e kërkesave të ligjshme që unanimisht janë prezantuar publikisht qoftë nga OMK-ja si organizatë profesionale dhe nga Federata e Sindikatave të Shëndetësisë së Kosovës, si organizatë sindikale përfaqësuese e punëtorëve shëndetësor.

Greva është mjet legjitim i rregulluar me legjislacionin në fuqi dhe e drejtë e natyrës themelore në korpusin e të drejtave të njeriut.

Ne konsiderojmë se të gjitha palët që janë akterë social dhe publik, duhet të veprojnë mbi bazën e arsyes. Kjo arsye duhet t’i ketë parasysh nevojat konkrete në sektorin e shëndetësisë, duke e trajtuar këtë sektor si një nga sektorët më vital shoqëror.

Meqenëse edhe në planin politik dhe shoqëror, shëndetësia është promovuar si prioritet i padiskutueshëm shoqëror, ne kërkojmë që statausi i profesionistëve shëndetësor, qoftë nga aspekti socio ekonomik apo edhe juridiko-statusor, të rregullohet me qëllim që ky sistem të jetë funksional dhe efektiv. Të gjitha palët duhet të kërkojnë zgjidhje duke pasur parasysh postulatin kryesor për mirëmabjtjen e këtij sistemi, që nënkupton – KUSHTE, IMUNITET DHE STATUS TË DINJITETSHËM TË PROFESIONISTËVE SHËNDETËSOR NË PËRGJITHËSI, DHE TË MJEKËVE NË VEÇANTI SI BOSHTI KRYESOR PROFESIONAL I SISTEMIT SHËNDETËSOR.

Prishtinë, 17 dhjetor 2018

                                                                                                                                                                                                       Këshilli Drejtues i OMK-së