Dr. Gail Carson- Ligjëruese në Kongresin e III-të të Mjekësisë

Dr. Gail Carson është mjeke e sëmundjeve infektive të të rriturve, e cila për herë të parë vizitoi Kosovën në vitin 2001 për të punuar me profesor Salih Ahmetin në CCHF.
Diplomën e saj mjekësore e ka marrë nga Universiteti i Edinburgut dhe më pas ka studiuar sëmundjet infektive në Mançester, ku Prof. Ahmeti vizitoi departamentin dhe mbajti një prezantim. Puna në laboratorin special të patogjenëve në Porton të Anglisë ishte posti i saj i parë si Këshilltare.
Në vitin 2011, Dr. Carson u largua nga agjencia e shëndetit publik të Anglisë për të bashkë-udhëhequr në formimin e Konsorciumit Ndërkombëtar i Infeksioneve Akute të Rënda të Frymëmarrjes dhe Infeksioneve në zhvillim, ISARIC. Një konsorcium ndërkombëtar i hulumtimeve klinike për të karakterizuar patogjenët që janë shfaqur dhe zhvilluar shpejtë, që u është përgjigjur gjatë dekadës ndaj Ebolës, Zikës, MERS-it, lisë së majmunëve, COVID-19 etj.
Në vitin 2016 Dr. Carson u zgjodh në Rrjetin Global të Alerteve dhe Përgjigjeve Emergjente ( GOARN), një rrjet prej mbi 270 institucioneve që përgatitin dhe u përgjigjen urgjencave të shëndetit publik. Në vitin 2017 ajo formoi ekipin hulumtues të GOARN dhe në vitin 2018 u zgjodh zëvendëskryetare. Pikërisht në këtë rol ajo po udhëheq në përcaktimin e strategjisë për 4 vitet e ardhshme për GOARN. Prezantimi i saj do të fokusohet në të dyja këto rrjetet ndërkombëtare në kontekstin e sigurisë globale shëndetësore.