Docent Dr. Shaban Memeti- Ligjërues në Kongresin e III-të të Mjekësisë me temën Pandemia COVID-19, Sfidat dhe Përvojat

Docent Dr. Sahaban Memeti ka lindur më 07.03.1974 në fshatin Dobrosht,Tetovë.

Shkollën fillore dhe të mesme e ka kryer në Tetovë. Në vitin akademik 1993/99 është regjistruar në Fakultetin e mjekësisë në Tiranë, të cilin e ka kryer në 30.07.1999 me sukses mesatar 9,4.

Në mars të vitit 2009 e ka dhënë provimin specialistik për kirurgji të fëmijëve pranë Fakultetit të mjekësisë në Shkup.

Në vitin 2012 regjistrohet në ciklin III – studime të doktoraturës pranë Fakultetit të mjekësisë në Shkup.

Tema e punimit të doktoraturës është: “Krahasimi i metodës endoskopike me atë konservative në trajtimin e refleksit vezikouretral” .

Në periudhën nga muaji gusht të vitit 1999 e deri në nëntor të vitit 1999 punon si mjek në kampin e refugjatëve kosovarë në fshatin Neproshten, Tetovë (si bashkëpunëtor i organizatës humanitare gjermane „Die Johanniter”). Pas kësaj, nga gushti i vitit 2001 deri në shtator të vitit 2004 bën punën e Drejtorit të poliklinikës „EM-MEDIKA”, në fshatin Dobrosht, Tetovë. Nga shtatori i vitit 2004 punon si mjek në Klinikën universitare të kirurgjisë së fëmijëve – Shkup, ndërsa në prill të vitit 2007 zgjidhet asistent në lëndën e Kirurgjisë pranë Fakultetit të mjekësisë „Sh. Kirili dhe Metodi” – Shkup.

Nga muaji tetor i vitit 2009 njëkohësisht e kryen edhe detyrën e Drejtorit të Institutit të shëndetit publik të Republikës së Maqedonisë së Veriut.

Më 10.05.2019 zgjidhet Docent në katedrën e kirurgjisë së përgjithshme dhe atë të fëmijëve pranë Fakultetit të mjekësisë në Shkup.

Krahas gjuhës shqipe dhe asaj maqedonase, Dr. Memeti flet edhe gjuhën angleze, serbe dhe kroate.

Si autor dhe koautor ka publikuar më shumë se 90 publikime në revista prestigjioze në vend dhe jashtë vendit, si dhe në konferenca dhe kongrese nacionale dhe ndërkombëtare. Gjatë 5 viteve të fundit ka publikuar 6 punime në revista me impakt faktor.

Ka marrë pjesë në më shumë punëtori në vend dhe jashtë vendit, nga të cilat si më të rëndësishme do i veçonim: më shumë punëtori dhe konferenca të organizuara nga ECDC (Qendra Evropiane për parandalim dhe kontroll të sëmundjeve); punëtori të Organizatës Botërore të Shëndetësisë; takime të Codex Alimentarius; më shumë punëtori dhe konferenca të B.E.N.A. (Balkan Environmental Association – Shoqatës Ballkanike të Ekologjisë).

Në vitin 2009 Dr. Memeti përfundon trajnimin dy javor në Repartin e kirurgjisë pediatrike pranë Spitalit protestant Oberhauzen në Gjermani.

Në vitin 2006 ndjek trajnim një javor në fushën e urologjisë së fëmijëve në Universitetin Mansur në Egjipt.; ndërsa në periudhën nga 24-28 prill të vitit 2017 dhe 9-13 tetor të vitit 2017 merr pjesë në mënyrë aktive në punëtorinë për urodinamikë dhe uroterapi të organizuar nga Klinika e kirurgjisë së fëmijëve në Prishtinë në bashkëpunim me Repartin e kirurgjisë së fëmijëve pranë Spitalit universitar Linkoping, Suedi. Këtu Dr. Memeti i përsosi teknikat dhe çasjet klinike tek fëmijët me infeksione të traktit urinar, sëmundjen e refluksit veziko-uretral dhe modalitetet e trajtimit të RVU.

Përveç kësaj, Dr. Memeti është edhe përfaqësues nacional në rrjetin EpiSouth për kontroll të sëmundjeve infektive në vendet e Mesdheut dhe në Ballkan (EpiSouth: Network for communicable diseases control in Mediterraneancountries and Balkans), si dhe kryetar i Forumit të qendrave mjekësore për trajnim në kuadër të MediPIET – Mediterranean Programme forIntervention Epidemiology Training (Programi mediteran për trajnim për epidemiologji intervente).

Docent Dr. Shaban Memeti është anëtar i Forumit këshillëdhënës pranë ECDC dhe anëtar i Komitetit për mbështetje teknike të Fondacionit nacional për transplantim. Ai është person kontakti i OBSH-së në fushën e Rregullores shëndetësore nacionale (International Health Regulation); Kryetar i komitetit nacional dhe person kontakti i Codex Alimentarius; si dhe person kontakti për Marrëveshjen për masat sanitare dhe fitosanitare në kuadër të Organizatës Botërore të Tregtisë.

Dr. Memeti është person kontakti edhe për bashkëpunim në shëndetësinë publike me OBSH, UNICEF, ECDC, UNFPA, etj. Docent Dr. Memeti ka marrë pjesë në më shumë komisione të fushën e shëndetësisë në Republikën e Maqedonisë së Veriut, si: Komisioni për barnat, Komisioni në Fondit e sigurimit shëndetësor për mjekimin e pacientëve jashtë vendit; Komiteti për mbrojtjen e mjedisit jetësor, etj.

Gjithashtu, Docent Dr. Memeti është anëtar në më shumë shoqata dhe asociacione profesionale, si: Oda e mjekëve të Republikës së Maqedonisë së Veriut (ku njëkohësisht është edhe anëtar i Këshillit drejtues dhe anëtar i bordit redaktues të Vox Medici); anëtar i Shoqatës së kirurgëve në Maqedoninë e Veriut; anëtar i Shoqatës së mjekëve, stomatologëve dhe farmacistëve shqiptar në Republikën e Maqedonisë së Veriut; anëtar i B.EN.A. (Shoqatës Ballkanike të Ekologjisë) dhe anëtar i IANPHI (International Association of National PublicHealth Institutes – Asociacionit ndërkombëtar të instituteve nacionale të shëndetit publik).