Certifikohet rezultati përfundimtar i zgjedhjeve për Odën e Mjekëve

Është certifikuar rezultati përfundimtar i zgjedhjeve për Odën e Mjekëve të Kosovës, të mbajtura më 1 dhjetor në 68 njësi zgjedhore.

Nga këto zgjedhje janë certifikuar 140 anëtarë të Kuvendit të OMK-së, shkruan Gazeta Shneta.

Dr. Shaban Osmanaj nga Këshilli Qendror i Zgjedhjeve, ka bërë të ditur se në Panelin për Ankesa janë paraqitur 3 ankesa, dy prej të cilave janë refuzuar si të pa bazuara.

Osmanaj ka thënë se nuk ka pas ndryshime të mëdha nga rezultati preliminar.

“Kemi pas katër raste ku kanë qenë votat e njëjta për kandidatët dhe është hedhur shorti ndërmjet tyre, në njësitë zgjedhore në Spitalin e Pejës, Gjakovës, Kaçanik dhe Spitali i Gjilanit”, ka deklaruar Osmanaj.

Nga zgjedhjet kanë dalë 119 kandidatë, ndërsa 21 të tjerë përzgjidhen nga delegimet. Kuvendi i OMK-së me 140 anëtarët e rinj do të themelohet më 14 dhjetor.

Osmanaj e ka konsideruar procesin zgjedhor të rregullt dhe demokratik.

Njëjtë ka vlerësuar edhe kryetari i Federatës Sindikale, Blerim Syla. “Ky proces ka qenë shumë demokratik në bazë të të dhënave të vëzhguesve tonë. Uroj që edhe Kuvendi të shkojë kështu”, ka deklaruar ai. /Gazeta Shneta/