Ceremonia e përfundimit të fazës së parë të trajnimeve profesionale.

Oda e Mjekëve të Kosovës organizoi ceremoninë e përfundimit të fazës së parë të trajnimeve profesionale.

Në këtë ceremoni të pranishëm ishin Dr. Pleurat Sejdiu, kryetari i Odës së Mjekëve, Dr. Arsim Emini, drejtor i Spitalit të Përgjithshëm Gjilan, Dr. Narqize Arënliu – Hoxha, drejtoreshë e Spitalit të Përgjithshëm, Prizren.

Dr. Pleurat Sejdiu, kryetar i Odës së Mjekëve, në një fjalim rasti shpjegoi se këto trajnime janë rezultat i aktivitetit të planifikuar në Marrëveshjen e Delegimit të Fondeve dhe Zbatimit ndërmjet Odës së Mjekëve të Kosovës dhe Projektit Zhvillimor të Luksemburgut, gjithashtu falënderoi LuxDev-in për gadishmërinë e realizimit të një projekti të tillë si dhe financimin e trajnimeve të realizuara me qëllim të ngritjeve të kuadrove të stafit shëndetësor.

Kryetari i OMK-se ka paralajmëruar investimin me mbi 300.000 euro në profilizime të mjekëve specialist dhe specializantëve gjatë vitit 2023.

Dr. Narqize Arënliu – Hoxha u shpreh e kënaqur me interesimin e mjekëve për të ndjekur këto trajnime si dhe me institucionet të cilat e bënë të mundur të realizohet ky projekt. Ajo tha se përfituesit e këtij projekti janë mjekët tanë që kanë ndjekur trajnimin dhe tutje pacientët që do të marrin këto shërbime në rajonin e Prizrenit.

Dr. Arsim Emini tha se trajnimet dhe infrastruktua është ndihma që i është kërkuar LuxDev-it si dy hallkat kryesore ku Spitali i Përgjithshëm i Gjilanit ka qenë më dobët. Me këtë rast falënderoi edhe ligjëruesit të cilët ndanë eksperiencat e tyre me mjekët tanë.

U ndanë çertifikatat e mjekëve të cilët morën pjesë në këto trajnime profesionale, të spitalit të Përgjithshëm të Gjilanit dhe mjekëve të Spitalit të Përgjithshëm të Prizrenit.

Kryetari i Odës së Mjekëve, Dr. Pleurat Sejdiu përmbylli ceremoninë ku edhe tha se projekti i OMK-së me mbështetje të Luksemburgut do të jetë me financa më voluminoze për vitet e ardhshme, kjo në varësi se si do të vazhdoj tutje implementimi i këtij projekti.