Rezultatet e Anketës ”Dhuna ndaj mjekut”

Prishtine, 04.06.2018

Në vazhdën e aktiviteteve të OMK-së në ndërtimin e një strategjie për përmirsimin e raporteve mjek-pacient dhe anasjelltas, përmirësimin e kualitetit të ktyre raporteve dhe vetë shërbimeve të dhëna, OMK  ka planifikuar që gjatë vitit 2018 të organizoj tri sondazhe/anketa.

1. Dhuna ndaj mjekut
2. Kujdesi dhe qajsa e mjekut ndaj pacientit, së bashku me PRAK
3. Percepcioni i mjekut mbi raportimet e mediave mbi mjekët

Të dhënat e hulumtimit

Oda e Mjekëve të Kosovës ka implementuar anketën mbi dhunën ndaj mjekut në periudhën nga 11 Maji deri me 21 Maj 2018.

Në këtë anketë morën pjesë mjekët nga të gjitha nivelet shëndetësore në Kosovë.

Metoda e anketimit ka qenë online, ku pyetësori është dërguar përmes linkut me email tek të gjithë anëtarët e OMK-së. Përgjigje në pyetësorin e parashtruar kanë dërguar 381 anëtarë të OMK-së (12.09% nga totali i mjekëve të anëtarësuar), prej tyre 61.80% ishin të gjinisë mashkullore dhe 38.20% të gjinisë femrore.

Mostra ishte e përbërë si vijon: 75.6% specialistë , 16.2% specializanta dhe 8.2% mjekë të tjerë. Shumica e mjekëve të anketuar janë të punësuar në sistemin spitalor sekondar 36.6%, pastaj në kujdesin primar shëndetësor 29%, në QKUK  24.10%, në institucionet private 7.10 dhe në institutet e mjekësisë emergjente 3.2%.

Në bazë të rezultateve të anketës, 78.8 % e mjekëve të anketuar kanë përjetuar një formë dhune/sulmi verbale apo fizik gjatë ushtrimit të profesionit të tyre ku në pesë vitet e fundit. 97.3% e rasteve të sulmit  kanë ndodhur brenda institucionit shëndetësor përderisa 2.7% kanë ndodhur jashtë institucionit shëndetësor.

Kështu, 81.40% e mjekëve të intervistuar vunë në dukje se sulmet në vendin e punës ishin verbale, 1.4% e mjekëve përjetuan sulme fizike, ndërsa 17.5% e mjekëve u përgjigjen që përjetuan të dy llojet e sulmit atë fizik dhe atë verbal.

Sjellja e dhunshme në 68.7% të rasteve erdhi nga  familjaret e pacientave ndërsa 15.7% nga vet pacientët. Është shqetësuese që shumica e mjekëve (67.10%) që kanë përjetuar dhunë nuk e kanë raportuar këtë dhunë.

Për mos raportimin e dhunës, mjekët shpesh përmendin frikën e krijimit të problemeve shtesë, reagimin e mundshëm të mjedisit, ose frikën e përseritjes së sulmit. Prej atyre që kanë paraqitur dhunën, 58.20% kanë raportuar dhunën te punëdhënsi i tyre, 40.5% në Polici dhe vetëm 1.3% kanë paraqitur dhunën në Gjykatë.

Kështu, 30% e mjekëve të cilët kanë qenë të ekspozuar ndaj dhunës ndjejn frikën e përsëritjes së saj në rast të raportimit, kurse 1 % mjekëve janë hospitalizuar si pasoj e sulmit.

93% e mjekëve të anketuar kanë vlerësuar që mbrojtja fizike në institucione shëndetësore nuk është në nivel të duhur.

75.4% e mjekëve konsiderojnë se edukimi shtesë në menagjimin e pacientëve, do të ndihmonte në zbutjen e sjelljeve të dhunëshme të pacientëve apo familjarëve të tyre.

Rezultatet e plota të hulumtimit:  Sondazhi “Dhuna ndaj mjekut” prezentimi