Obligimi ligjor për anëtarësim në Odën e Mjekëve të Kosovës

Të nderuar,

Profesionistët shëndetësor në përgjithësi, madje kuadri mjekësor në veçanti, janë komunitet i profesionistëve që janë bartës të përgjegjësisë profesionale që për nga substanca përmbajtësore vetvetiu kërkon vetorganizim dhe vetëkontrollim profesional dhe deontologjik. Kjo nevojë nuk është fenomen i izoluar vetëm për ne, profesionistët shëndetësor, por për shumë profesione që kanë përgjegjësi shoqërore para se gjithash, si p.sh. avokatët, noterët, përmbaruesit privat etj. OMK-ja është një nga odat e profesionistëve shëndetësor që është themeluar sipas fuqisë ligjore (ex lege). Deri sa shumë organizime të ndryshme jo-qeveritare themelohen nga numri i caktuar i personave që shprehin vullnetin lidhur me një iniciativë për një kauzë të caktuar, odat e profesionistëve shëndetësor janë themeluara me bazë juridiko-ligjore sipas Ligjit Nr. 04/L-150 për Odat e Profesionistëve Shëndetësor.

Sipas kësaj bazë juridike, respektivisht Nenit 8, paragrafit 1 të Ligjit Nr. 04/L-150 për Odat e Profesionistëve Shëndetësor, theksohet se: “Anëtarësimi në Oda është i detyrueshëm për të gjithë doktorët e mjekësisë, doktorët e stomatologjisë, farmacistët e diplomuar, infermierët e diplomuar, mamitë e diplomuara, fizioterapeutët e diplomuar…”. Ndonëse OMK-ja ishte themeluar në vitin 2013, kur kishte mbajtur Kuvendin themelues dhe ishin zgjedhur organet themelore të saj, e më pas ishin nxjerrë edhe aktet normative themelore të Odës, OMK-ja nuk ishte funksionale. Të gjithë ne, mjekët si korpusi kryesor i profesionistëve shëndetësor kemi qenë të zhgënjyer për mosfunksionalitetin e Odës. Madje si bartës kryesor të shërbimeve shëndetësore, ne do të duhej të ndihemi sa të mërzitur aq edhe të ndërgjegjshëm që të gjitha odat të tjera të profesionistëve shëndetësor janë të funksionalizuara dhe të organizuara më mirë sesa organizata jonë. Kjo me të vërtetë është për keqardhje.

Në mbledhjen e parë të Kuvendit të OMK-së ne kemi vendosur që procesin e regjistrimit të obligueshëm ligjor të anëtarësisë ta fillojmë menjëherë duke vënë afate konkrete. Kështu që të gjithë anëtarët që janë të deleguar nga institucionet gjegjëse shëndetësore që përbënin njësitë zgjedhore nga të cilat janë deleguar anëtarët e Kuvendit, kanë marrë përsipër obligimin që të menaxhojnë shpërndarjen, mbledhjen dhe dorëziminn e formularëve për anëtarësim në OMK, të cilët së bashku me dokumentacionin përcjellës do të duhej ta përmbyllin në kohë sa më të afërt, për ta dorëzuar atë më së voni deri më 1 shkurt, në zyrat e selisë së OMK-së.

Për këto arsye shfrytëzojmë rastin që të apelojmë tek të gjithë doktorët e mjekësisë që ta përmbushin këtë obligim ligjor i cili është në të mirën e kolektivit tonë profesional, e po ashtu edhe në të mirën tonë individuale në po këtë kuptim. OMK-së së shpejti do t’i barten kompetncat publike, që realisht është baza kryesore e fushëveprimtarisë së Odës. Ndër kompetencat të karakterit publik me rëndësi më të veçantë sipas Nenit 9, paragrafit 1 me nën-paragrafin 1.3 është licencimi, rilicencimi dhe revokimi i licencave. Mospërmbushja e këtij obligimi ligjor krijon bazën juridie dhe faktike që profesionistit mjekësor të mos i lëshohet licenca, respektivisht t’i revokohet e njëjta për shkaqe edhe të tilla. Për këtë ne jemi duke i përgatitur hapat institucional në drejtim të formalizimit të bashkëpunimit me Inspektoratin Shëndetësor i cili në kuadrin e inspektimit rutinor do të bëjë edhe inspektimin lidhur vërtetimin e faktit për përmbushje të obligimit ligjor nga Ligji Nr. 04/L-150 për Odat e Profesionistëve Shëndetësor.

OMK-ja për të gjitha arsyet e lartëshënuara ju inkurajon të kontaktoni me të deleguarit e institucionit tuaj shëndetësor në Kuvendin e OMK-së duke plotësuar formularin dhe siguruar të gjitha dokumentacionet e nevojshme për ta përfunduar këtë proces tejet të rëndësishëm për organizatën tonë.

Një odë e fuqishme do të thotë një mjek i mbrojtur me dinjitet, i respektuar profesionalisht dhe i vetëpërmbajtur me ndërgjegjen e tij profesionale.

Ne nuk kemi alternativë tjetër. Organizim, angazhim dhe aktivitet. Oda e Mjekëve funksionale, kuadri mjekësor i organizuar.

Me respekt,

Kryetari i OMK-së
Dr. Pleurat Sejdiu