Kryeministri Kurti dhe Ministri Vitia vizitojnë Odën e Mjekëve të Kosovës

Kryeministri i Republikës së Kosovës, z. Albin Kurti, së bashku me Ministrin e Shëndetësisë, z. Arben Vitia, vizituan sot Odën e Mjekëve të Kosovës, ku u mirëpritën nga Kryetari i OMK-së, Dr. Pleurat Sejdiu, nënkryetarët Dr.Rrezart Halili Dr.Naser Gjonbalaj, Dr.Lauras Idrizi dhe , Kryetari i Këshillit Drejtues, Dr.Faik Shatri, si dhe përfaqësues të tjerë të odës.

Gjatë takimit u diskutua për punën e deritanishme të Odës së Mjekëve të Kosovës, rezultatet e arritura, sfidat aktuale, si dhe objektivat dhe planet e ardhshme për zhvillimin e sistemit shëndetësor në vend. Në fokus të veçantë ishin çështjet që lidhen me mungesën e mjekëve, nevojën për zëvendësimin e mjekëve pensionistë me mjekë të rinj, si dhe zhvillimi profesional i profesionistëve shëndetësorë.

Po ashtu, u theksua si lajm pozitiv rënia e ndjeshme e largimit të mjekëve nga vendi, si dhe ulja e numrit të kërkesave për trajtim jashtë Kosovës. U bë e ditur se nga rreth 5,500 mjekë të licencuar nga OMK-ja, 150 janë nga komunitetet joshumicë, ndërsa vetëm në gjashtë muajt e fundit janë licencuar rreth 50 mjekë nga komuniteti serb, duke u integruar në sistemin shëndetësor të Kosovës.

Në këtë takim u vlerësua bashkëpunimi i vazhdueshëm ndërmjet Kryeministrisë, Ministrisë së Shëndetësisë dhe Odës së Mjekëve të Kosovës, si një faktor kyç për përmirësimin e sistemit publik shëndetësor dhe rritjen e cilësisë së shërbimeve për qytetarët.

Kryetari i OMK-së, Dr. Pleurat Sejdiu, theksoi se çdo pacient në sistemin shëndetësor publik është pacient i institucionit dhe jo i një mjeku të veçantë, duke nënvizuar rëndësinë e bashkëpunimit institucional për ofrimin e shërbimeve cilësore dhe të qëndrueshme shëndetësore.

Kryeministri Kurti shprehu falënderimin për mikpritjen dhe angazhimin e Odës së Mjekëve, duke vlerësuar kontributin e saj në mbarëvajtjen e sistemit shëndetësor dhe duke shprehur mbështetjen e plotë të Qeverisë për këtë institucion.

Ndërkaq, Ministri i Shëndetësisë, z. Arben Vitia, nënvizoi rëndësinë e bashkëpunimit të ngushtë ndërmjet Odave Profesionale dhe Ministrisë së Shëndetësisë, veçanërisht në drejtim të zhvillimit profesional të profesionistëve shëndetësorë dhe ofrimit të shërbimeve sa më cilësore për qytetarët.

Në përmbyllje, drejtuesit e Odës së Mjekëve falënderuan Kryeministrin dhe Ministrin për vizitën dhe shprehën gatishmërinë e tyre për një partneritet të vazhdueshëm dhe të ngushtë në funksion të zhvillimit të sistemit shëndetësor dhe forcimit të shërbimeve publike shëndetësore.