U vendos gurthemeli i Objektit të Odave të Profesionistëve Shëndetësorë të Kosovës

Sot u mbajt ceremonia solemne e vendosjes së gurthemelit të Objektit të Odave të Profesionistëve Shëndetësorë të Kosovës, duke shënuar një moment të rëndësishëm për profesionistët shëndetësorë dhe për zhvillimin institucional të sistemit shëndetësor në Republikën e Kosovës.
Në ceremoni morën pjesë Kryetarët e odave profesionale shëndetësore, Ministri i Shëndetësisë, Kryetari i Komunës së Prishtinës, Ambasadori i Dukatës së Madhe të Luksemburgut, përfaqësues të partnerëve ndërkombëtarë, anëtar të Këshilleve Drejtuese të odave si dhe përfaqësues të mediave.

Me vënien e këtij gurthemeli u theksua rëndësia e këtij projekti të përbashkët, i cili simbolizon bashkëpunimin institucional, përkushtimin profesional dhe vizionin për të ardhmen e shëndetësisë në vend. Objekti i përbashkët i Odave të Profesionistëve Shëndetësorë është rezultat i një pune të gjatë dhe të koordinuar dhe përfaqëson një hap të rëndësishëm drejt krijimit të kushteve më të mira për funksionimin institucional të Odave dhe avancimin e rolit të profesionistëve shëndetësorë.

Me këtë rast, në emër të odave të profesionistëve shëndetsor, Kryetari i Odës së Mjekëve të Kosovës, Dr. Pleurat Sejdiu, theksoi se ky projekt përfaqëson realizimin e një ëndrre tetëvjeçare, falë përkushtimit të vazhdueshëm institucional dhe mbështetjes financiare të Dukatës së Madhe të Luksemburgut. Ai falënderoi të gjithë bashkëpunëtorët për kontributin e dhënë dhe shprehu gatishmërinë për bashkëpunime të mëtejshme në të ardhmen.

Ky investim realizohet me mbështetjen e projektit “Programi për mbështetjen e sektorit të shëndetësisë në Kosovë”, financuar nga Dukati i Madh i Luksemburgut dhe Qeveria e Republikës së Kosovës, dhe implementohet nga Ministria e Shëndetësisë dhe LuxDev, Agjencia e Luksemburgut për Bashkëpunim Zhvillimor.

Objekti i ri do të shërbejë si hapësirë e përbashkët për bashkëpunim, zhvillim profesional dhe forcim institucional, në funksion të përmirësimit të shërbimeve shëndetësore dhe në shërbim të profesionistëve shëndetësorë dhe qytetarëve të Republikës së Kosovës.
Vendosja e këtij gurthemeli obligon të gjitha palët e përfshira që ta çojnë përpara këtë projekt me përkushtim dhe përgjegjësi deri në përfundimin e tij me sukses.