Kryetari i Odës së Mjekëve të Kosovës, Dr. Pleurat Sejdiu priti në takim udhëheqës nga organizata “Aksioni për Nëna dhe Fëmijë” (AMC)

Kryetari i Odës së Mjekëve të Kosovës, Dr. Pleurat Sejdiu priti në takim udhëheqës nga organizata “Aksioni për Nëna dhe Fëmijë” (AMC) për të diskutuar mbi zbatimin e programit të Sistemit të Referimit Neonatal në Kosovë. Ky program, i mbështetur nga Geisel School of Medicine në Dartmouth College dhe i drejtuar nga neonatologu i njohur, Dr. George Little, synon të rrisë kapacitetet e trajtimit për foshnjat e lindura para kohe.

AMC ka punuar për integrimin e Sistemit të Referimit Neonatal në Kosovë që nga viti 2018, duke organizuar trajnime për neonatologët dhe infermierët e QKUK-së dhe duke avokuar për avancimin e kujdesit neonatal. Me mbështetjen e Fullbright, Dr. Little, së bashku me profesionistët Dr. Steven Ringer dhe infermieren Victoria A. Flanagan, do të ofrojnë një trajnim të ri për stafin mjekësor të Kosovës, me qëllim përdorimin efektiv të autoambulancës së re të dedikuar për Sistemin e Referimit Neonatal.

Në shenjë falënderimi për kontributin e tyre të çmuar në sistemin shëndetësor të Kosovës, OMK dorëzoi mirënjohje për Dr. George Little dhe znj. Victoria Flanagan.

Takimi i ardhshëm synon të forcojë bashkëpunimin mes Odës së Mjekëve të Kosovës dhe AMC duke eksploruar mundësitë për edukimit të vazhdueshëm profesional në fushën e shëndetësisë neonatale dhe organizimin e trajnimeve dhe vizitave studimore në Geisel School of Medicine në Dartmouth College.