Njoftim per anetaret e OMk-se lidhur me verifikimin e te dhenave
18 Tetor 2021Të nderuar anëtarë,
Viti 2021 shënon vitin e fundit të mandatit të II-të të Kuvendit të Odës së Mjekëve të Kosovës. Rrjedhimisht, organet kompetente të Odës kanë filluar përgatitjet për organizimin e zgjedhjeve për mandatin e III-të për Kuvendin e Odës dhe për arsye të tilla Komisioni Qendror i Zgjedhjeve i OMK-së, me qëllim të sigurimit të ushtrimit të së drejtës themelore në pjesëmarrje në procesin zgjedhor, shfrytëzon rastin që t’i drejtohet anëtarësisë duke bërë thirrje për ndërmarrjen e veprimeve të nevojshme për tu ushtruar e drejta në zgjedhje.
Për tu mundësuar secilit anëtar ushtrimi i të drejtave zgjedhore, si e drejta për të zgjedhë dhe për të qenë i zgjedhur, të gjithë anëtarët e OMK-së duhet të përmbushin të gjitha detyrimet financiare në raport me OMK-në. Po ashtu, mjekët të cilët ende nuk janë anëtarësuar, nuk do të mund të marrin pjesë në procesin zgjedhor pa e pasur statusin aktiv të anëtarit të regjistruar.
Gjithashtu, të gjithë mjekët të cilët, për arsye të ndryshme, u janë ndrysuar të dhënat personale, siç janë të dhënat mbi vendin e punës, adresës së vendbanimit dhe të dhënat të tjera relevante, ftohen që këto të dhëna t’i plotësojnë jo më larg se data 28 tetor të këtij viti. Për nevoja të verifikimit të të dhënave të tilla, OMK në ueb faqen zyrtare ka hapur makinën elektronike të kërkimit në të cilën mund të bëhet verifikimi i të dhënave personale dhe të cilën mund ta gjeni në këtë vegzë: Verifikimi i të dhënave për anëtarët e OMK-së.
Ndryshe, ju njoftojmë se po ashtu detyrimi për t’i përditësuar të dhënat personale në bazën e të dhënave të OMK-së është detyrim ligjor i paraparë me dispozitat e Nenit 13 të Ligjit Nr. 04/L-150 për Odat e Profesionistëve Shëndetësor.
Çdo dështim për t’i përmbushur kushtet e theksuara në këtë njoftim, nënkupton pamundësinë e ushtrimit të së drejtës në zgjedhje.
Shpresojmë që çdo anëtar në pëmrbushje të detyrimeve të tilla juridike do të përfshihet në procesin zgjedhor duke e rritur cilësinë dhe nivelin e këtij procesi demokratik.
