THIRRJE PËR DORËZIMIN E ABSTRAKTEVE – Kongresi i 14-të Ballkanik i ORL dhe Kirurgjisë së Kokës dhe Qafës

Oda e Mjekëve të Kosovës, në bashkëpunim me Shoqatën e Otorinolaringologëve dhe Kirurgëve të Kokës dhe Qafës së Kosovës, ka kënaqësinë të shpallë thirrjen për dorëzimin e abstrakteve për Kongresin e 14-të Ballkanik të ORL dhe KKQ.

Ju ftojmë të bëheni pjesë e një prej ngjarjeve më të rëndësishme shkencore në rajon, i cili do të mbahet në Prishtinë, më 11–13 Qershor 2026, në Hotel Emerald. Ky kongres do të mbledhë ekspertë të njohur, klinicistë, studiues dhe profesionistë shëndetësorë nga Ballkani dhe më gjerë, duke krijuar një platformë të rëndësishme për shkëmbim të dijes dhe përvojës.
Pavarësisht nëse jeni specialist me përvojë, specializant apo në fazat e hershme të karrierës suaj akademike, kjo është një mundësi ideale për të prezantuar punën tuaj shkencore, përvojat klinike, teknikat inovative dhe rezultatet kërkimore para një audience ndërkombëtare. Kontributi juaj do të ndihmojë drejtpërdrejt në avancimin e praktikës klinike dhe forcimin e bashkëpunimit profesional.

Inkurajojmë dorëzimin e abstrakteve në një gamë të gjerë temash që ndërlidhen me ORL dhe KKQ, përfshirë: punime klinike, studime kërkimore, prezantime rastesh, teknika kirurgjikale, inovacione diagnostike dhe terapeutike, si dhe qasje multidisiplinare.

Afati i fundit për dorëzimin e abstrakteve: 15 Maj 2026

👉Për dorëzim të abstraktit dhe informata shtesë:

Abstract Submission – 14th Balkan Congress, 11-13 June 2026

Abstraktet duhet të dorëzohen në gjuhën angleze. Të drejtë aplikimi kanë mjekët e ORL dhe KKQ, por edhe audiologët, mjekët e përgjithshëm, teknikët medicinalë, infermierët dhe profesionistë të tjerë të disiplinave të ndërlidhura.

Ju inkurajojmë ta shpërndani këtë thirrje dhe të kontribuoni në suksesin e Kongresit të 14-të Ballkanik të ORL dhe Kirurgjisë së Kokës dhe Qafës, i cili organizohet në bashkëpunim me partnerë vendorë dhe ndërkombëtarë.