Oda e Mjekëve të Kosovës merr pjesë në Simpoziumin e përvitshëm të ZEVA-s në Vjenë

Oda e Mjekëve të Kosovës, e përfaqësuar nga Nënkryetari i OMK-së, Dr. Rrezart Halili, dhe Sekretari i Përgjithshëm, z. Gramoz Jakupi, po merr pjesë në Simpoziumin e përvitshëm të ZEVA-s (Odat e Mjekëve të Evropës Qendrore dhe Lindore), i cili këtë vit po mbahet në Vjenë të Austrisë, ku nikoqir është Oda e Mjekëve të Austrisë.

Gjatë ditës së parë të takimit, përfaqësuesit e odave të mjekëve nga vendet pjesëmarrëse po diskutojnë çështje aktuale dhe me interes të përbashkët për profesionin mjekësor dhe sistemet shëndetësore.

Në fokus të diskutimeve janë transferimi i detyrave dhe profesionet e reja shëndetësore (task shifting), si dhe edukimi i vazhdueshëm profesional (CME). Në kuadër të prezantimeve të delegacioneve, përfaqësuesit e OMK-së prezantuan situatën dhe zhvillimet aktuale në Kosovë lidhur me këto fusha, duke pasqyruar edhe rolin e Odës në rregullimin dhe zhvillimin e profesionit mjekësor.

Punimet e Simpoziumit do të vazhdojnë edhe më 5 shtator, ku në fokus do të jetë telemjekësia dhe zhvillimet e saj në vendet pjesëmarrëse.

Pjesëmarrja e OMK-së në këtë forum ndërkombëtar mundëson shkëmbimin e përvojave dhe praktikave me odat homologe evropiane, si dhe kontribuon në forcimin e bashkëpunimit profesional dhe institucional për adresimin e sfidave të përbashkëta në shëndetësi.

Rreth ZEVA-s

ZEVA është forum i përvitshëm i odave të mjekëve të Evropës Qendrore dhe Lindore, i cili shërben si platformë për diskutim, bashkëpunim dhe shkëmbim të përvojave lidhur me çështje të rëndësishme për profesionin mjekësor dhe sistemet shëndetësore të vendeve pjesëmarrëse.