Kosova qendër e bashkëpunimit shkencor – Po mbahet Kongresi i 14-të Ballkanik i ORL-së

Oda e Mjekëve të Kosovës, në bashkëorganizim me Shoqatën e Otorinolaringologëve dhe Kirurgëve të Kokës dhe Qafës të Kosovës, po zhvillon Kongresin e 14-të Ballkanik të Otorinolaringologjisë dhe Kirurgjisë së Kokës dhe Qafës, i cili po mbahet nga 11 deri më 13 qershor 2026 në Prishtinë. Kongresi ka mbledhur rreth 400 profesionistë shëndetësorë, me mbi 90 ligjërues nga 19 vende të Ballkanit, Evropës dhe më gjerë, duke e shndërruar Kosovën në një qendër të rëndësishme të bashkëpunimit shkencor dhe profesional në fushën e ORL-së dhe kirurgjisë së kokës dhe qafës.

Në ceremoninë solemne të hapjes, në emër të Odës së Mjekëve të Kosovës, Zëvendëskryetarja e OMK-së theksoi se mbështetja e aktiviteteve shkencore dhe edukimit të vazhdueshëm profesional mbetet një nga prioritetet kryesore të Odës. Ajo vlerësoi se organizimi i këtij kongresi dëshmon se shkenca dhe profesionalizmi nuk njohin kufij dhe se përmes shkëmbimit të dijes avancohen vazhdimisht shërbimet shëndetësore për pacientët.

Punimet e kongresit po vazhdojnë edhe sot, në ditën e fundit të tij, me ligjërata, prezantime shkencore dhe punëtori profesionale që trajtojnë zhvillimet më të fundit në otologji, rinologji, laringologji, kirurgjinë onkologjike të kokës dhe qafës dhe ORL-në pediatrike.

Programi i plotë i kongresit dhe lista e ligjëruesve mund të gjenden në faqen zyrtare të kongresit: https://orl-ks.org/sq/scientific-program/